Beste Luisteraar
Ons het net geweet hierdie ou Covid-donkerwolk het êrens ‘n blink skynseltjie. En toe kom dit inderwaarheid in die vorm van ons jongste luistersyfers. Ons kan nou bekend maak dat RSG se luistertal jaar op jaar tot 1.33 miljoen luisteraars gestyg het.
Vir alle stasies saam is daar 37.8 miljoen mense wat enige tyd van die week na radio luister in Suid-Afrika. Boonop luister 46% van hierdie luisteraars meer as 20 uur per week na radio. Altesame 73% luister op die tradisionele radio (RSG 81%), 35% op hul selfoon (RSG 14%) en 25% op hul voertuig se radio (RSG 32%).
Byna die helfte (48%) van RSG se luisteraars luister nét RSG, wat beteken hulle is baie lojale luisteraars, is lief vir hulle stasie, neem eienaarskap en daarom laat weet hulle baie gou vir my as hulle van iets hou of nie. Só sal dit dan ook wees met die enkele programverskuiwings wat Julie-maand in werking tree.
Intussen werk die meeste van ons by RSG in dié grendeltyd steeds van die huis af, buiten die wonderlike kollegas wat ingaan ateljee toe om jou stasie op lug te hou, sodat jy steeds kan luister.
Finansiële uitdagings eis sy tol by baie werkplekke en ook by die SABC. Herstrukturering en gepaardgaande afleggings lê ook vir RSG voor in die volgende paar maande.
Tye is onseker en vreemd. Ons almal ervaar dít. Maar kom ons probeer vorentoe kyk en die uitdagings trotseer en selfs redes vind vir humor, en om dankbaar te wees.
Magdaleen en die RSG-span
