Beste Luisteraar
Kyk, ons Suid-Afrikaners is ‘n interessante en diverse nasie. En die grendeltyd bring baie positiewes en negatiewes na vore. Ek is aangenaam verras oor hoe vinnig ons omroepers en regisseurs hulle kon inrig by hul huise om van daar af insetsels, onderhoude en programme bymekaar te sit vir uitsaai. Kyk hier na ‘n paar foto’s.
Vlak 4 van die inperking maak nie eintlik ‘n verskil aan uitsaai nie, want dit word as ‘n noodsaaklike diens beskou. Die enigste probleem was dat ons geen dramas, boekvoorlesings of vervolgverhale kon opneem nie. Dit lyk asof ons wel nou enkeles sal kan opneem maar onder streng beperkings. Ons hou julle op hoogte.
Iets wat nou wel op vlak 4 toegelaat word, is om soggens tussen 06:00 en 09:00 in jou buurt te mag stap, draf of fietsry. En toe kry ons ‘n plan.
Baie dankie luisteraars vir al die mooi e-posse van dank wat ons die afgelope tyd kry van julle. Ek is bly julle het die kunstefees-bydraes so geniet. Julle positiewe terugvoer gee ons weer woema om ons beste vir julle te doen onder omstandighede. Maar ons wonder of julle méér radio luister in die inperkingstyd. Neem gou-gou deel aan ons opname, asseblief.
Magdaleen en die RSG-span
