Beste [FNAME]
Ek sit nou skuins duskant ‘n maand in die warm stoel. Dis vir my ’n voorreg om my eerste RSG nuusbrief met elkeen te deel. Die herstrukturering en afleggings by die SAUK is einde Maart 2021 afgehandel. Al is die vaste personeel en administrasiespan tans nog onvolledig, doen ons en jou gunsteling omroepers ons bes om steeds programme en musiek van goeie gehalte aan ons 1,3 miljoen luisteraars regoor Suid-Afrika te bring.
In hierdie uitgawe vertel ek so bietjie meer oor myself, my agtergrond en my gesin – sodoende kan jy my beter leer ken. Ek wil jou verseker dat jou gunsteling radiostasie in goeie hande is met ’n span wat passievol oor elke luisteraar, adverteerder en belanghebbende is!
Ons drama-afdeling is hard aan die werk om elke Donderdagaand om agtuur vermaak uit die boonste rakke te lewer, so loer gerus na Spooktrein en nog ‘n voorskou van Radioteater. Reëlings vir die nuwe dokumentêre seisoen wat op 1 Julie afskop, is goed op dreef en daar is ook ’n nuwe reeks of twee in die pyplyn, waarvan jy meer in die volgende uitgawes kan lees.
Dankie vir jou getroue ondersteuning en lojaliteit teenoor RSG – sonder jou kan RSG nie voortbou op die afgelope 84 jaar nie. Ek sien daarna uit om die pad vorentoe saam met jou te stap.
Met winter om die draai, hou jouself en jou geliefdes (en viervoetige geliefdes) warm en veilig! RSG gaan ook saam met Winterhoop uitreik om ’n verskil hierdie winter te maak. Veral noudat Eskom dalk nie die koue gaan help verdryf nie.
Groete,
Louise en die RSG-span
