Beste Luisteraar
Midde-in grendeltyd, waar ek soos baie van ons luisteraars van die huis af werk, het ek ‘n brokkie goeie nuus ontvang. RSG is een van die radiostasies wat die afgelope boekjaar ‘n wins getoon het. Al wat ek kan sê is: dankie aan al ons getroue luisteraars en gewaardeerde kliënte!
Die omroepers hou jou stasie op die lug. Hulle mag net ingaan na die ateljee om ‘n skof te doen, en wel gepantser met masker en ‘n lappie vir die jik en ontsmettingsmiddel waarmee vóór en ná elke skof skoongemaak word. Een ding waarvan ek seker is, is dat ‘n nuwe normaal aangebreek het. Gaan ons nog so baie kantoorruimtes benodig, veral met die nuwe tegnologie wat beskikbaar is? Maar ek besef ook dat die mens ‘n tropdier is wat sosiale en fisieke kontak met die ander lede van sy trop nodig het.
Lynette Frances, ons kollega en aanbieder van Praat Saam, het aan eie lyf gevoel hoe die grendeltyd jou planne omver kan gooi. Sy moes haar en Ashley se beplande huwelikseremonie en onthaal in die Kaap op die nippertjie kanselleer. Maar tog is sy nou mev. Frances-Puren. Sy vertel die storie.
Maak seker jy bly in die geselskap van RSG. Luister en kyk na ons omroepers se grendelboodskappe. Ons hou jou op hoogte van die jongste verwikkelinge met Covid-19 en ons probeer om jou op te beur waar ons kan, soos met die heruitsendings van vorige RSG Kunstefees-programme.
Magdaleen en die RSG-span
