Beste Luisteraar
Ek bespeur so ‘n kriewelrigheid onder mense. Ek sien en hoor dit op sosiale media en inbelprogramme, sms en e-posse.
Die krapperigheid se oorsprong, lyk dit my, spruit uit Covid-19, al die moets en moenies en grendelregulasies wat nie altyd sin maak nie en ongerief en skade veroorsaak. Ons mis ons familie en vriende. Daar’s van ons vriende en familie, selfs vreemdelinge, wat hul werk en sake-ondernemings verloor het. Alles het beslis ‘n impak op my en jou gemoed.
By die SAUK is ons versoek om steeds, indien moontlik, van die huis af te werk. Die omroepers is ons helde, want hulle gaan steeds ateljee toe om die stasie op lug te hou.
In hierdie vreemde tyd, kan ek nie die regte woorde vind nie, buiten om te sê, kyk rondom jou en help waar daar nood is, as jy enigsins kan. En beskerm jouself deur ‘n masker te dra, afstand te hou tussen jou en iemand anders, groot samedrommings van mense te vermy en gereeld jou hande te was. Iewers moet dinge weer beter gaan.
Hou moed. RSG hou jou graag geselskap met die reis op ons Jolige Kannabus, Geestesgesondheids-gesprekke, hulde aan Elize Cawood, dokumentêre programme, landboubesprekings, regsake, sport, musiek en al die res.
Magdaleen en die RSG-span
