Beste [FNAME]
Kyk elke wolk het ‘n silwer randjie. In hierdie moeilike tyd van onsekerhede (maar dat RSG voortgaan, is geen onsekerheid nie), het ek net weer besef hoe sterk RSG staan in Suid-Afrika én ook by ons oorsese luisteraars. En ook hoe wyd en deur wie ons radiostasie geluister word. Ek is dus nie verbaas dat ons lojaliteitsyfer op ‘n almintige 48% staan nie.
Baie dankie vir die boodskappe en ondersteuning sedert die SAUK se afleggingsproses bekend gemaak is. Dít was nou ‘n goeie barometer vir RSG om te kan besef dat PBS-radio en spesifiek RSG ‘n ongekende belangrike rol speel om luisteraars in te lig, te bemagtig en te vermaak. En in baie gevalle is ons ‘n lewens-aar. Dit laat die RSG-span net weer besef watter groot taak op ons skouers rus om altyd eerlike, professionele en kwaliteit werk te lewer.
Wat betref die SAUK se herstruktureringsproses, is daar nog onsekerhede. Die afleggingsproses is vir eers tot einde Januarie 2021 opgeskort terwyl verdere gesprekke en konsultasies tussen rolspelers gedurende Desember plaasvind. So, niemand word in Desember afgelê nie. Die uitkoms van Desember se onderhandelsgesprekke tussen verskeie rolspelers sal waarskynlik die pad vorentoe bepaal.
Intussen gaan RSG voort om met passie vir jou geselskap te hou, veral oor die feesseisoen. Ons sal ook in die volgende nuusbrief meer vertel van wat alles voorlê in die programbeplannings vir die feestyd.
Ek hoop julle geniet die sport-uitsendings, ons radiodramas oor Goëlstories en ‘n Masjientjie, ons wens al die RSG/Sanlam Radiodrama-skryfkompetisie wenners geluk, ons nuwe boekvoorlesing (want Hans is met mening terug), en al ons ander programme.
Magdaleen en die RSG-span
