Beste [FNAME]
Kyk, ek het besef ons luisteraars is baie lojaal en ons is baie dankbaar vir jou volgehoue ondersteuning, maar in dié onsekere tye by die SAUK, het ek ervaar hóé lojaal die RSG-span is. Hoe sê mens dankie vir só ‘n span waarop ‘n mens in goeie en moeilike tye kan staatmaak?
Dié lojaliteit is veral ‘n riem onder my hart omdat Maart vir van ons kollegas ook die laaste maand van hul SAUK-loopbaan is. By die SAUK, en dus ook RSG, is die proses van advertering van poste byna afgehandel en word onderhoude tans gedoen met kandidate.
Dis juis danksy die RSG-span dat ons weereens ‘n handvol nuwe programme en projekte kan aankondig, van ‘n nuwe vervolgverhaal en boekvoorlesing, tot nuwe dokumentêre (oor Weskus-vissersmense en Addo se olifante) en oor dorpe.
Goeie nuus oor rsg.co.za, is dat ons van die uitdagings met die nuwe webtuiste kon regstel en binnekort sal daar ook weer ‘n soekfunksie by potgooi wees, wat jou ervaring op rsg.co.za soveel makliker sal maak.
Geniet die programme op jou stasie en bly gesond.
Magdaleen en die RSG-span
